اسلام آباد (مانیٹرنگ ڈیسک) قومی احتساب بیورو (نیب) نے جعلی اکاؤنٹس کیس میں 8 ارب روپے کی مشکوک ٹرانزیکشن سے متعلق ضمنی ریفرنس میں سابق صدر اور پاکستان پیپلزپارٹی کے شریک چیئرمین آصف علی زرداری کے وارنٹ گرفتاری جاری کردیے ہیں. اس حوالے سے جاری ایک اعلامیے میں کہا گیا کہ چیئرمین نیب جسٹس (ر) جاوید اقبال نے آصف زرداری کے وارنٹ گرفتاری پر دستخط کردیے ہیں‘مذکورہ معاملے پر نیب نے موقف اپنایا ہے کہ آصف زرداری اربوں روپے کے مشکوک ٹرانزیکشن کے کیس میں مطلوب ہیں سابق صدر نے اس مشکوک ٹرانزیکشن کے ذریعے ذاتی گھر خریدا.
دوسری جانب اسلام آباد ہائیکورٹ میں 8 ارب روپے کی مشکوک ٹرانزیکشن سے متعلق کیس میں آصف زرداری کی درخواست ضمانت پر سماعت آج ہوگی جس میں نیب کی جانب سے ان کی ضمانت کو مسترد کرنے کی استدعا کی جائے گی. خیال رہے کہ عدالت عالیہ نے آصف زرداری کی آج تک عبوری ضمانت منظور کر رکھی ہے جبکہ آج ان کے نیب کے وکلا دلائل دیں گے ادھر پاکستان پیپلزپارٹی نے سابق صدر آصف زرداری کے وارنٹ گرفتاری جاری ہونے کی شدید مذمت کی پیپلزپارٹی کی سیکرٹری اطلاعات نفیسہ شاہ کا کہنا تھا کہ پیپلزپارٹی اس نیب گردی کو مسترد کرتی ہے آصف زرداری کے وارنٹ جاری کرنا تشویشناک، قابل مذمت اور انتقامی کارروائی ہے.انہوں نے کہا کہ سابق صدر کورونا اور بیماری کے باوجود پابندی سے عدالت کے روبرو پیش ہوتے آئے ہیں، تاہم عدالت میں پابندی سے پیش ہونے اور تعاون کے باوجود وارنٹ جاری کرنا سمجھ سے بالاتر ہے نفیسہ شاہ کے مطابق سابق صدر ہسپتال میں زیرعلاج ہیں، اس دوران وارنٹ جاری کرنا ملک میں انارکی پھیلانے کی سازش ہے حکومت اس طرح کے فیصلوں سے اپوزیشن کی تضحیک کرنا اور حالات خراب کرنے کی سازش فوری بند کرے.انہوں نے کہا کہ پاکستان ڈیموکریٹک موومنٹ (پی ڈی ایم) کے جلسے کے ایک روز قبل وارنٹ جاری کرنے کا فیصلہ حکومت کی بوکھلاہٹ کا واضح ثبوت ہے ان کا کہنا تھا کہ نیب حکومت کے ہاتھوں میں کھیلنا بند کرے، پیپلزپارٹی نیب کے اس کالے قانون کو مسترد کرتی ہے‘انہوں نے کہا کہ پیپلزپارٹی کی قیادت
قانونی ٹیم سے مشاورت کے بعد وارنٹ کے اجراءسے متعلق فیصلہ کریں گے.خیال رہے کہ سابق صدر آصف زرداری، ان کی بہن فریال تالپور اور متعدد دیگر کاروباری افراد کے خلاف سمٹ بینک، سندھ بینک اور یو بی ایل میں 29 ‘بے نامی اکاؤنٹس کے ذریعے 35 ارب روپے کی جعلی ٹرانزیکشنز سے متعلق 2015 کے کیس کے طور پر تحقیقات کی جارہی ہیں اس سلسلے میں ایف آئی اے نے معروف بینکر حسین لوائی کو گرفتار کیا تھا جس کے بعد اگست 2018 میں جعلی اکاو¿نٹس کیس میں ہی اومنی گروپ کے چیئرمین انور مجید اور ان کے بیٹے عبدالغنی مجید کو بھی گرفتار کر لیا گیا تھا.
7 ستمبر 2018 کو سپریم کورٹ نے سابق صدر اور ان کی بہن کی جانب سے مبینہ طور پر جعلی اکاؤنٹس کے ذریعے اربوں روپے کی منی لانڈرنگ کیے جانے کے مقدمے کی تحقیقات کے لیے جوائنٹ انویسٹی گیشن ٹیم تشکیل دے دی تھی. اس جے آئی ٹی نے سابق صدر آصف علی زرداری، ان کی ہمشیرہ فریال تالپور سے پوچھ گچھ کی تھی جبکہ چیئرمین پی پی پی بلاول بھٹو سے بھی معلومات حاصل کرنے کا فیصلہ کیا تھا آصف علی زرداری نے جے آئی ٹی کو بتایا تھا کہ 2008 سے وہ کسی کاروباری سرگرمی میں ملوث نہیں رہے اور صدر مملکت کا عہدہ سنبھالنے کے بعد انہوں نے خود کو
تمام کاروبار اور تجارتی سرگرمیوں سے الگ کرلیا تھا.بعد ازاں اس کیس کی جے آئی ٹی نے عدالت عظمیٰ کو رپورٹ پیش کی تھی، جس میں 172 افراد کا نام سامنے آیا تھا جس پر وفاقی حکومت نے ان تمام افراد کے نام ای سی ایل میں شامل کردیے تھے اس کے بعد سپریم کورٹ نے یہ کیس نیب کے سپرد کرتے ہوئے 2 ماہ میں تحقیقات کا حکم دیا تھا اور نیب نے اس کے لیے مشترکہ انویسٹی گیشن ٹیم قائم کی تھی جس کے سامنے آصف زرداری پیش ہوئے تھے.15 مارچ کو کراچی کی بینکنگ عدالت نے جعلی اکاؤنٹس کے ذریعے منی لانڈرنگ سے متعلق کیس کی کراچی سے اسلام آباد منتقلی کی نیب کی درخواست منظور کی تھی جس کے بعد اسلام آباد کی احتساب عدالت کے جج محمد ارشد ملک نے اس کیس میں نامزد آٹھوں ملزمان کو طلب کرتے ہوئے سماعت 8 اپریل تک ملتوی کی تھی اور 9 اپریل کو احتساب عدالت نے باقاعدہ طور پر جعلی بینک اکاؤنٹس اور میگا منی لانڈرنگ کیس کی سماعت کا آغاز کیا تھا.
