لاہور (نیوز ڈیسک) حافظ سعید کے گھر کے قریب دھماکا،کئی مشکوک افراد کو حراست میں لے لیا گیا ۔تفصیلات کے مطابق لاہور میں جماعت الدعوۃ کے سربراہ حافظ سعید کے گھر کے قریب ہونے والے بم دھماکے کی تحقیقات کے دوران سی ٹی ڈی نے مختلف شہروں میں چھاپے مار کر کئی مشکوک افراد کو حراست میں لے لیا ہے۔ذرائع کے مطابق دھماکے کے مقام کے قریبی علاقے کی جیو فینسنگ کر لی گئی ہے۔سی ٹی ڈی اور حساس اداروں نے شواہد محفوظ کرنے کا عمل مکمل کر لیا ہے۔دھماکے کی جگہ سے بال بیرنگ ، لوہے کے ٹکڑے اور گاڑی کے پارٹس اکٹھے کیے گئے ہیں۔سی ٹی ڈی ذرائع کے مطابق جوہر ٹاؤن دھماکے بعد پنجاب کے مختلف شہروں میں سرچ آپریشن کیا گیا اور دھماکے میں ملوث عناصر کا سراغ لگانے کے لیے مزید سرچ
آپریشن بھی جاری ہے۔رات گئے کیے گئے سرچ آپریشن کے دوران 10 سے زائد مشتبہ افراد کو حراست میں لیا گیا۔علامہ اقبال انٹرنیشل ائرپورٹ سے بھی ایک مشتبہ شخص کو حراست میں لیا گیا جو گوجرانوالہ کا رہائشی ہے اور جہاز کے ذریعے لاہور سے کراچی فرار ہونے کی کوشش کر رہا تھا۔مشتبہ شخص کو پرواز سے آف لوڈ کر کے حساس اداروں نے حراست میں لے لیا جبکہ مذکورہ شخص کو تفتیش کے لیے نامعلوم مقام پر منتقل کر دیا گیا گیا ہے جہاں اس سے دھماکے سے متعلق پوچھ گچھ کی جائے گی۔سی ٹی ڈی ذرائع کے مطابق دھماکے میں استعمال ہونے والی گاڑی بابو صابو چیک پوسٹ سے داخل ہوئی تھی اور فوٹیج کے مطابق گاڑی بابو صابو چیک پوسٹ پر گزشتہ روز صبح آئی تاہم ناکے پر موجود اہلکاروں نے گاڑی کو روک کر چیک نہیں کیا۔
