لاہور ( نیوز ڈیسک) صوبہ پنجاب کے دارالحکومت لاہور کی کینال روڈ پر پولیس اہلکار کو کچلنے والے بگڑے امیر زادے سے متعلق اہم انکشافات سامنے آگئے ، حمزہ جاوید نامی ملزم نجی ہوٹل میں حساس ادارے کا افسر بن کر کمرے کا مطالبہ کرتا رہا ، ملزم نے ہوٹل کے مینجر کے ساتھ تلخ کلامی بھی کی جس پر انتظامیہ نے 15 پر کال کر کے پولیس کو بلوا لیا ، 2 اہلکار ہوٹل پہنچے اور حمزہ جاوید کو دھر لیا ملزم کو اس کی گاڑی سمیت تھانہ لے جاتے وقت اس نے گاڑی بھگا دی۔تفصیلات کے مطابق کینال روڈ پر موٹرسایئکل سوار کو گاڑی تلے کچلنے کے واقعے کی ایف آئی آر تھانہ سول لائن میں
کانسٹیبل منور خان کی مدعیت میں اقدام قتل، اغواء اور دیگر دفعات کے تحت درج کر لی گئی۔ایف آئی آر میں مؤقف اختیار کیا گیا کہ ملزم نے ساتھ بیٹھے اہلکار کو دھمکایا اور اسے اغواء کرنے کی بھی کوشش کی ، دوسرے اہلکار نے گاڑی کا تعاقب کر کے اسے روکنے کی کوشش کی تو حمزہ جاوید نے اس پر گاڑی چڑھا دی ، جس سے پولیس اہلکار سمیت 3 افراد زخمی ہو گئے تاہم موٹرسائیکل پھنسی ہونے کے باوجود ملزم نے گاڑی بھگائی جس کے باعث آگ لگ گئی۔خیال رہے کہ لاہور کی کینال روڈ پر نشے میں دھت شخص نے شہری اور پولیس اہلکار پر گاڑی چڑھا دی تھی ، ہفتے کے روز پنجاب کے دارالحکومت لاہور میں انتہائی تشویش ناک اور افسوسناک واقعہ پیش آیا ، سوشل میڈیا پر گردش کرنے والی ویڈیوز کے مطابق لاہور کی مصروف ترین شاہراہ کینال روڈ پر نشے میں دھت ایک امیر زادے نے ایک شہری اور پولیس اہلکار کو اپنی رینج روور گاڑی کے تلے روند ڈالا۔بتایا گیا ہے کہ گاڑی کے ڈرائیور نے تیز رفتاری کے باعث کینال روڈ پر ڈولفن پولیس کی موٹرسائیکل کو ٹکر مارنے کے بعد ایک پولیس اہلکار اور اور ایک شہری کو روند ڈالا ، اس موقع پر پولیس اور شہریوں نے اکٹھے ہو کر نشے میں دھت شخص کو پکڑنے کی کوشش کی تاہم وہ جائے وقوعہ سے فرار ہوگیا۔بعد ازاں نشے میں دھت ڈرائیور اپنی رینج روور لے کر برکت مارکیٹ کے علاقے میں پہنچ گیا، جہاں پولیس نے تعاقب کرکے گاڑی کو روکا ، اسی دوران گاڑی میں آگ بھڑک اٹھی اور فائر بریگیڈ کے پہنچنے سے قبل ہی گاڑی جل کر خاکستر ہوگئی بعد ازاں فائر بریگیڈ نے آگ پر قابو پا لیا تاہم گاڑی مکمل طور پر تباہ ہو چکی تھی جب کہ پولیس نے ڈرائیور کو حراست میں لیکر تحقیقات شروع کر دیں۔
